حكاوي الشياب 3

من طرف **Maryam** 2012-05-23, 02:24

السلام عليكم ورحمة الله....كيف حال الشياب أقصد بنات المنتدى عدنالكم اليوم بسالفة جديدة من سوالف الشياب ..تابعونا

الساعة الحين الساعة الخامسة والنصف صباحا ..وتلفون الشايب خلف يرن..رننننننننننننننن..ترننننننننننن..ويقوم الشايب خلف منتقز على نغمات الهاتف..

الشايب خلف::أعوذ بالله من الشيطان الرجيم ...أصبحنا واصبح الملك لله ..من ذا تو بو يتصل من غبشة ..اللهم أجعله خير..

ويرفع الهاتف...هلو صبحكم الله بالخير ..هلو من معي تو.. رفع صوتك ماأسمعك زين..

ويرد الشايب سلوم::ألو ألو صباح الخير ..معك سلوم ...كيف مو أنتقزت...أحيدك تهيس وتقرز فذيك المزرعة من الفجر مونقزك اليوم..

الشايب خلف::وحدي ماظاري(متعود) حد يدق علي من غباشة ..هات مو عندك ..هذا الأتصال وراه شيء

سلوم::الله يسلمك ويسلم غاليك باغين نروح اليوم على خولة الدختر...شمجنا خلفان مرقد وقلنا عاد مايصير مانروح نشرف عليه شوية...

خلف::لاحول و لاقوة إلا بالله ..موجاه.. أحيدني امس مار عليه ..وجالس يحدر(تنظيف النخل وترتيبها) النخل وامسي عليه..

سلوم::ترا ه عاد قدره كذاك أوين البيدار(حبل طلوع النخل)نسلخ منه وماعلم ودرا غير طايح على ظهره

خلف::مسكين مايهون ..بس حسبوني معكم ..بروح

سلوم::الساعة أربع العصر تسمع الهرن مرة طلع ولا تتحجر..

خلف ::ولايهمك..زين يوم خبرتي ..أحسنت أحسنت. .كله ولا خلفان عاد..مايهون مسكين

الشيبة سلوم وولده خالد يمروا على خلف ويدق الهرن..بييييييييييييييييييب بــــــــــــــــــــــــــــيب

وعلوووووووووووووه جاي جاي ..سمعته هرنك..شوي شوي عليه لايشوط(خلف)

ويخرج الشايب خلف وماسك في يده كيس..ويدخل السيارة

سلوم::خلف أشوف فيدينك كراع. .على موناوي ..موجايب معك

خلف::ياخي اليوم خارف حبتيـــــــــن رطب تبشرة وقلت أذاوق مسكين خلفان..وكان ناوي أجيب دلة قهوة..غير خفت عن الدخاتر يسوولنا بعد ربشة..

خالد::الله يهديك العم خلف بس تو نحن مارايحين نجلس تحت السبلة عشان تجيب فواله..رايحين لنزور مريض.

خلف::خلا خلا سموا بسم الله ..وقدامنا الرحمن..لاتجلسوا تسوولنا سالفة...خلود. .أنت ماعليك غير تسوق وهلهالله فينا عاد عن السرعة..

خالد::بسم الله ..وعلى بركة الله

وبعد نصف ساعة ::الشايب سلوم::خلف ..او خلف. .تو انت ماتسمعني

خلف::تو موعندك سلوم. .وحدي تراني باقي متعجب من ذي العمارات اللي طولها طول الدنيا. .حتى رقبتي احسها نحالت على صوب..

سلوم. .دوكم هين جالس يشوف. .شوف وين ذي الخضرا بو هنا ..يوم ادري كذاك كان جبت معي مجز(أداة لقطع اللأعشاب)نعم الأرض مستويةا خضرا خضرا زينيتها. .كان زين انترس جواني من ذا المعشب الغاوي.

خالد::تو بويسمعكم يقول رايحين دولة أجنبية.؟؟؟

سلوم::تريد الصدق ولدي وحدي أستكاود طول الشوارع.. ومن زمان ماجيت هنا ..بس أسمع من الناس ..من كذاك الشباب طايبين ترا عشان ذي الخيرات هنا..

وبعد دقائق توقفت السيارة ووصل الجماعة المستشفى

خالد::أقول الوالد ..ترا أرضية المستشفى شوي تزحط..فاحسب حسابك

سلوم::ولايهمك ترا عندي هذي الباكورة اتقشعبها الجدار الجدار

دخلو الجماعة وللأن البوابة زحمة ..دخل خلف ومعاه كيس الرطب.

خلف::السلام عليكم خلفان كيف حالك ..عساك اهون. .خطرة وسلامة

خلفان::وعليكم السلام بارك الله واجبكم. .أعرفكم ماتقصروا. .تعبتوا عمركم.

سلوم::لاتعب ولاشي..هذا واجبنا ..إن شاء الله احسن

خلفان:الحمد لله على كل حال..مواخباركم ومو اخبار الجيران مناك

سلوم:كلهم بخيرين محد شاكي باس...ماشي هرجة غير النخيل ..والرطب ..واللي باغي يسطني نخيل(تأجير النخل)

خلفان :يلة الحمد لله..ترا هذا القيض ..كيف سلوم ما سطنيت نخل

سلوم::مو اسطني خلفان ..النخلة واصلة ب100 ريال وشي ب150..خليها على الله بس

خلف::أقول. .خلو عنكم ذي الهرجة تو. .ولدي خالد سكر البردة(الستارة) شوية خلنا نتفول بذا الرطب عن حد يجي من الدخاتر

خلفان::فيك الخير ..وحدي اكل المستشفيات مايوالمني ..أكل غصب ..خلنا ناخذ حبتين..

خلف::كل كل أنته ولا همتك. .وإن شاء الله تطلع يالسلامة

خلفان. .بصراحة هجلتو علي بزيارتكم(ونستوني)..جالس مكاني والدخاتر حد رايح وحاد جاي ..يا يعطوني برات ولاحبوب ..وباقي ضجران.. متضايق. .وجيتكم هذه شويه هجلتني

سلوم::أفا عليك. .إن شاء الله بتطلع بالسلامة ..وراح ندق عليك بالتيلفون نطمن عليك. .أنت بس صبر شوية وكلها يومين وتردلنا السبله

وبعد ساعه من الزيارة...ما يسمع الشياب إلا صوت حارس اللأمن (أنتهت الزيارة. .يرجى من الزوار ..التقيد بالوقت)

خلف::أقول خلفان اسمحلنا عاد ..نحن تترخص عنك. .عوين خلصت الزيارة. .واجر وعافية. .وكان فخاطرك شي لاتستحي ترانا أخوان..

خلفان::بالحل مسموحين..واحسنتوا على الزيارة. .سلموا على السائل

الشياب:في امان الله

خلفان::الله معكم

وانتهت الزيارة وعاد الشياب للبلد

من طرف **صوت الفجر** 2012-05-25, 13:14

حلووووووة وغاوية بس بعدني ما كملتها

لي عودة للتكملة

من طرف **الآنسة منشن** 2012-06-01, 00:48

//

انتهت الزيارة
وانتهت أوقاتنا الممتعة مع الشياب
عزيزتي مريم ..سلمت يمينك ع روعة ما كتبتي
يعطيك ربي العافية ~
بارك الله فيك ...

حكاوي الشياب 3 Cik036grg

من طرف **طالبة علم** 2012-06-04, 14:45

نعم أنهم نشامى أصحاب واجب
من قدكم يا خلف وسلوم
حبيبتي مريومة استمعت كثيرا وأنا أقرأ حكايتك الرائعة
دمت متألقة ومبدعة
دوما في انتظار ابداعك

من طرف **Maryam** 2012-06-08, 02:27

والبركة فيكن حبيباتي ...إن شاء الله طابت الجلسة مع الشياب

حكاوي الشياب 3

حكاوي الشياب 3

رد: حكاوي الشياب 3

رد: حكاوي الشياب 3

رد: حكاوي الشياب 3

رد: حكاوي الشياب 3