ذكرياتك مع الصور

الآنسة منشن كتب:

وأمـــــا عن الرقاط والنخل والجداد ..
فإني لا أحمل ذكريات معها

خسارة فاتش نص عمرش...أما عن نفسي سوالفنا سوالف...انتظر ذكريات البقية وبعدها نرجع لكم

صراحة كنا نشيطييييييين نقوم من الصباح عشان نروح نرقط..وفي تنافس اللي يملئ الطشت اكثر...بس كنت أسكاود من الجداد..يعني الجو حار وعاد إذا بعض الكرب فيه ذر وسقاطييييين..يعني بيزيد الطين بله..بس الحمد لله الذر والسقاط أهون من أكلة النحلة والدبية..أذكر اختي ياحليلها رايحة تقطف امباوكان نكفة دبي..وماحست إلاوالدبي لابسنها..ومن كثر اللسعات طاحت من الشجرة..وجسمها مسكينة تورم..

الآنسة منشن كتب:

وأمـــــا عن الرقاط والنخل والجداد ..
فإني لا أحمل ذكريات معها

أشوفها مطورة .......عالعموم راح نعيد ذكريات أيام اللعب والمرح مع هذه الصور..إن شاء الله تعجبكم..خليكم معانا..

المرنجحانة اتمنى محد طاح واتعور


اللي لحست تراب تعترف

المخطة


سيارا ت أيام زمان

ولاتنسوووووووون لعبة العنبر

قوت القلوب كتب:

والله ذكرتينا بايام زمان صور غاويه مريومه

بخصوص المرجحانه او المرجوحه او رنجوحه او مريحانه ترا تختلف المسميات

لعبتها من خاطري كنا نتجمع بنات واولاد الحاره البنات يتمرجحن والاولاد يطلعوا فوق السمره وعاد كل يوم حد يطيح

وبخصوص التراب بصراحه انا ماكلتنه واعترف ف هذي الصفحه كنا نصنع كيكه من التراب وبعدين نتذوق منها عن فوادنا خخخ تعرفي فواد بنات



















المخطه او الصيره وتكثر المسميات كانت لعبتي المفضله العبها مع بنات الجيران واذكر اني كنت اغشهن هههه

الموتر ما اعرف ما اذكر لعبتها يمكن اخواني
بس اذكر اني كنت اسرق سيكل اخواني لما يطلعوا واسوق كنت كل يوم اطيح

يعني طلعتي عمانية صح..بس أتمنى ماتعبتي امك دامك تركبي سيكل وتطيحين ..ترا نوبة ماقل منك بادني الشموخ من طياح السيكل اما المرنجحانة عليها ضرابة..والتراب لعبابه وخصووووصا مع لعبة العنبر..كان ودي أدرج صورة بس ماحصلت صورة قديمة..بس أذكب بنت جارتنا أغمى عليها ياحلياها ضربة الكورة لحقت عينها..وعشان محد يضربنا ماخبرنا حد بالسالفة..وعالجناها وحدنا..أما أسميها شقاوة

دمعة كتب:

ايام وايااااااااااااااام صراحة لما اتذكر ايام المدرسة وسواااالف البنات والمعلمااااات تجيني صيحة وضحكة ف نفس الوقت
وحتى الحين ف الكلية بس مو مثل ايام المدرسة

طبعا مايتقارن أبدا

الآنسة منشن كتب:

ياخي مريوم ليش تذكرينا بأيام زمااااااان

هيه هيه أيام العنبر والصياد والمغميضا والحجا _الدمى أو العرائس للتوضيح _وكنا نلعب وعيان ونتخيل نفسنا نطبخ ونلعب مدرسة
ومخطا شي أساسي

يا ليت ماضينا يعوووووود

ياالله على أيام الحجا..............أقول منشون سويتي عرس حال حجاتك..خخخ..أما سوالف

حمااس لا

وبعد اللعب والربشة...ننترككم مع هذه الصور...إحترامي الشديد للجدود والجدات...كيف كانت حياتك معاهم..وإيش ذكرياتك..يابختها اللي حصلت لخطة من جدتهاأوجدها...والله حلوين..وسوالفهم احلى..والله يخلي اللي مازالو على قيد الحياة ويبارك أعمارهم

قوت القلوب كتب:

عدت لاسطر كلماتي

والله يا مريم ذكرتينا بايام جد كانت حلوه وافتقدهم كثير كثير

ببدا بوالد امي وطبعا نسميه حبابوه ابو امي ما شفته توفى وامي كانت طفله يعني ماما عاشت يتيمه الاب اما حبوتي واللي هي والده امي اذكرها وكانت واااااااااااااااااااايد حنونه كنا دايما نحب نروح نجلس معها لدرجه انها كانت تعرفنا مع انها فاقده البصر توفت لما كنت صف الاول الله يرحمهم


اما ام ابوي واللي نناديها امي العوده توفت من 6 سنوات تقريبا كنا ف كل مناسبه نجتمع معها وفالعيد كانت اول وحده تعطينا العيديه الله يرحمها






عاد يجي دور ابوي العود اللي يكون ابو ابوي وعاد بصراحه هذا اكثر واحد فقدته اثر فيني سبحان الله اخر سنتين من حياته عاش معنا فالبيت كنت اكثر وحده احب اجلس معه كان دايما يطلب مني اقرا له كتب كان يناديني معلمه

كنت لما احس بضيق اجلس معه كان يحكيلي سوالفهم من زمان وكيف كانت حياتهم تعلقت فيه كثييييييييييييييييييييييير وفاته كانت صدمه

الله يرحمه ويرحم جميع موتانا
ما اوصيكن اللي عندها جد وجده تهتم فيهم وتحطهم ف عيونها

بصراحه افتقد انادي جدي وجدتي لكن سبحان الله هذه هي سنه الحياه

تقبلي مروري

.¸¸۝❝قوت القلوب❝۝¸¸.

فعلا وجودهم له أثر في نفوسنا ..الله يرحمهم ..وجودهم له طعم خاص..واوصي الجميع مايفرطو بمعاملة الكبار..بس ماشي مواقف مع العصى تعرفي مرات الشياب يعصبو على الصغيرين

ضحكتيني قوتوه......منشن وصوت انتظر تعليقاتكم